ឯកឧត្តម ស ថេត ដឹកនាំកិច្ចប្រជុំរៀបចំផែនការចេញប្រតិបត្តិការរឹតបន្តឹងអនុវត្តច្បាប់ចរាចរណ៍ផ្លូវគោកនៅក្នុងរាជធានីភ្នំពេញដើម្បីកាត់បន្ថយអត្រាគ្រោះថ្នាក់ចរាចរណ៍
07-February-2020 | ដោយ ពលមនសិការ
ភ្នំពេញ៖ ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញនៅព្រឹកថ្ងៃស្រុកទី០៧ ខែកុម្ភៈ ឆ្នាំ២០២០ បានដឹកនាំកិច្ចប្រជុំរៀបចំផែនការចេញប្រតិបត្តិការរឹតបន្តឹងច្បាប់ចរាចរណ៍ផ្លូវគោកនៅក្នុងរាជធានីភ្នំពេញដើម្បីកាត់បន្ថយអត្រាគ្រោះថ្នាក់ចរាចរណ៍ និងងកាត់បន្ថយអ្នកស្លាប់ និងអ្នករងរបួស ។ទន្ទឹមដែលអគ្គស្នងការនគរបាលជាតិ ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន បានយកគោលដៅរាជធានីភ្នំពេញសម្រាប់ការដកស្រង់បទពិសោធន៍ការងារអនុវត្តច្បាប់ចរាចរណ៍ផ្លូវគោកនៅឆ្នាំ២០២០នេះ។ បញ្ហាគ្រោះថ្នាក់ចរាចរណ៍នៅរាជធានីភ្នំពេញត្រូវគេមើលឃើញថាជាបញ្ហាប្រឈមគ្រោះថ្នាក់គួរឱ្យព្រួយបារម្ភ ។នៅឆ្នាំ២០១៩បានកើតឡើងបណ្តាលឱ្យមនុស្សស្លាប់ចំនួន៣៣៨នាក់ កើនជាងឆ្នាំ២០១៨ចំនួន៧៤នាក់ ចំណែកអ្នករងរបួសធ្ងន់និងស្រាលចំនួន១.៧៣២នាក់កើនជាងឆ្នាំ២០១៨ចំនួន៨៦៥នាក់។
ជុំវិញនៃការអនុវត្តន៍រឹតបន្តឹងច្បាប់ចរាចរណ៍ផ្លូវគោកនៅក្នុងរាជធានីភ្នំពេញ ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញបានមានប្រសាសន៍ដោយឱ្យលោកស្នងការរងទទួលផែនការងារចរាចរណ៍ លោកស្នងការរងទទួលផែនការងារសេនាធិការ លោកនាយការិយាល័យជំនាញ និងលោកអធិការខណ្ឌទាំង១៤ ត្រៀមប្រើប្រាស់កម្លាំងសរុប វិធានការសរុប និងមធ្យោបាយសរុប ដើម្បីអនុវត្តច្បាប់ចរាចរណ៍ផ្លូវគោកឱ្យមានប្រសិនភាព។ជាងនេះថែមទៀតឯកឧត្តមក៏មានសង្ឃឹមនិងជឿជាក់ថាការអនុវត្តច្បាប់ចរាចរណ៍និងសម្រេចបានលទ្ធផលល្អទៅតាមទិសដៅនិងផែនការរបស់រាជរដ្ឋាភិបាលក្នងការដោះស្រាយបញ្ហាបទល្មើសចរាចរណ៍ឱ្យមានការថយចុះ។
ឯកឧត្តម ឧត្តមសេនីយ៍ឯក ស ថេត ក៏ធ្លាប់មានប្រសាសន៍ថាការរឹតបន្តឹងច្បាប់ចរាចរណ៍ផ្លូវគោក គឺដើម្បីការពារអាយុជីវិតប្រជាពលរដ្ឋមិនមែនធ្វើបាបប្រជាពលរដ្ឋនោះទេនិងក៏បានអំពាវនាវឱ្យអ្នកប្រើប្រាស់ផ្លូវថ្នល់ទូទៅត្រូវនាំគ្នាចូលរួមគោរពច្បាប់ចរាចរណ៍និង បើកបរមានការយោគយល់អយ្យាស្រ័យគ្នា ដើម្បីចូលរួមចំណែកក្នុងការកាត់បន្ថយអត្រាគ្រោះថ្នាក់ចរាចរណ៍នៅក្នុងរាជធានីភ្នំពេញ ៕
ចំនួនអ្នកទស្សនា
- ថ្ងៃនេះ2251
- ម្សិលមិញ15681
- សប្តាហ៍នេះ61091
- ខែនេះ82971
- ឆ្នាំនេះ82971
- សរុប20525427